October 17, 2007                                        News You Can Trust!!                                      Volume 7

To’o Tupou V mei he ‘ulu SUTT

Tangata’eiki

Ko e kole ni ki he palesiteni ‘oe Siasi Uesiliana, kau faifekau moe konifelenisi kakato na’a kuo taimi ke to’o ‘a e Tu’i ‘a Siaosi Tupou V mei he’ene hoko ko e ‘ulu ‘oe Siasi Uesiliana.

Ko e ‘isiu ‘eni na’e talanga’i he kuohili pea ne malanga’i malohi ‘e Rev. Siupeli Taliai kae ‘ikai ke tali. Pea neu kau au he tui ‘oku kei fe’unga  pe ke ‘ulu ‘a e Tu’i koe’uhi ko e tu’unga malanga ‘a Tupou IV moe mo’ui fakalotu.

Ka ko e ‘aho ni ko e Tu’i fo’ou ‘a Tupou V ‘oku mo’oni ‘a e lea “hala he fika moe laukonga.” Ko ‘ene to’onga ‘oku ‘ikai hoa moe tui fakakalisitiane pea ko ‘ene ‘ulungaanga ‘oku fepaki moe tokateline ‘a e SUTT. Pea ‘oku tangi ‘a e kakai masiva ‘oe fonua ‘i he’ene fakaehaua ‘enau pa’anga mo totonu. ‘Oku sai pe ia ke hoko ko e memipa kae’oua ‘e hoko ko e ‘ulu ‘oe Siasi. ‘E angafefe ke ha’u ‘a e motu’a konaa mo fakausousa kene fakanofo ‘a e palesiteni ‘oe Siasi. ‘Oku ne ma’u ‘a e tu’unga mau’olunga taha he Siasi.

‘Oku tau hanga ‘o to’o ‘a e lakanga faifekau mei ha taha kapau ‘oku konaa ka ko ‘eni ko e tu’unga mau’olunga taha ‘eni he Siasi pea ‘oku ne fai ‘a e fakanofo ‘oe palesiteni.

Tangata’eiki palesiteni moe konifelenisi ‘oua mu’a tetau fakakuikui mei he pango ko ‘eni koe’uhi pe ko ‘ene ma’u ‘a e mafai mau’olunga he pule’anga. Ko e ‘Otua hotau taki pea ‘oua tetau fakahoholoto koe’uhi ko e ki’i Tu’i siokita ko ‘eni.

Fakatauange ‘e ‘oatu he ‘Eiki ‘a e lotolahi kemou fai ‘a e me’a totonu.

Faka’apa’apa atu