October 17, 2007                                        News You Can Trust!!                                      Volume 7

Nusinusi e lelei fakalukufua

Tangata'eiki,

'Oku 'ikai pe tuku e vili kikihi mai 'a e Palemia, ke fakahalaki e lau 'a e fakafofonga 'oe kakai.  Teu pehe ko'ene ma'a taha, ke 'ave TV Tonga 'o ui holo ha ngaahi fakataha'anga fakakolo pea tuku ke lea e kakai kae faitaa'i.  Ko'ene mahino mo'oni ia.  Koe 'ai e savea 'a e kau polisi, 'a e kau polisi na'a nau ta fakamanu e to'utupu, ta'e fakalao.   Kohai 'e fie fanongo mo tui atu kiai?  Kuo a'u nai e palemia 'o fetangutu'i moe kakai, 'o talanoa mo nautolu kene 'ilo ai honau loto?  Tuku e savea ia he ofisa kolo moe pule fakavahe he 'oku ta'epau ia.  Pea tuku e tala ngutu mai he 'oku 'ikai koha kalasi 1 eni.  Fai taa'i mai e kakai 'oku tala honau loto, kamau tui kiai.  Koe me'a ia na'e fai 'ehe OBN, koe 'ai ma'a pe.  Koe kau 'ofisa kolo ia moe kau pule fakavahe 'oku faingofua pe hono fakahekeheke'i, he 'oku nau ma'u lakanga.

Koe me'a fakaoli eni hono 'omi 'oe tama fakalelei mei 'amelika, koe tuonga'ane 'o e Minisita Lao.  'Oku fefe koa e fakakaukau 'ae pule'anga?  'Oku fu'u fakalautohi pule'anga 'aupito 'enau me'a kotoa pe 'oku fai he taimi ni.  Na'a mou 'omi e tokotaha fakalelei tau'ataina laulotaha, falala'anga, mataotao, poto'i analaiso fakapolitikale, taukei he ngaue fakalelei fakapolitikale he ngaahi palopalema faka Pasifiki.  Pea na'e 'ikai koia pe, ka na'a mou tanaki kiai moe kau poto mataotao mei he ngaahi mala'e kehekehe 'oe ako, koe kakai Tonga, 'o nau fai e savea, pea nau fatu moe fokotu'utu'u 'e lelei fakalukufua ma'ae kakai 'oe fonua, ki he lolotongani moe kaha'u.  Kuo hanga 'ehe Palemia mo 'ene kau minista moe ongo fakafofonga e toko ua 'o nusinusi e fo'i lelei fakalukufua koia, 'o li he kapa veve.  Kae toe to'o hake pe fo'i fokotu'utu'u koe 'oku lelei pe ki he tokosi'i (fale 'oe tu'i koloa'ia, mo kinautolu).

Kakai Tonga!!!  Tetau toe mavahe koa mei he fu'u luo ta'eoli koeni 'oku  fakatangutu tautolu ai 'ehe kau taki hotau pule'angani?  Koe kumi , fakatotolo, faka'ilo, hopo moe ta ena 'oku tau kei fanongo pe kiai.  'Asi mai moe finematu'a ko hono fakamatala'i matamata lelei mai e hao he, kae toe ta tikite he ('oku 'iai haamo fanau?).  Koe ha koa e lelei 'e ma'u ai?  Kuo tuku e fu'u fo'i hangatamaki he, kae to e fakamamafa 'ae pule'anga he nge'esi 'oe fakamaau totonu.   Koe  elito moe uho 'oe  16/11 'oku 'ikai koe tutu, moe fahi.  Koe ngaahi fehalaaki 'ae kau taki, ta'e fakatonutonu, koe 'elito moe uho ia.  'Oku a'u mai eni ki he ahoni, 'oku te'eki ai pe ke fai ha ngaue ia kiai - 'a e kei mahaehae 'etau kato pa'anga.

Kau taki mou 'ofa a 'o tuitui tatapuni e ngaahi fu'u ava falalahi 'oku tafe ai 'etau pa'anga, kae holo hifo a e tukuhau kamau mo'ui.  Tuku a hono tuli holo e fanau he 'oku 'ikai ha mou fakamo'oni lelei.  Mole taimi he me'a maumau taimi.  Kae fakahangahanga kehe mei he me'a naane fakatupu 'ae 16/11. 

Tau toki sio.

Matava'inga,
Ha'apai Veu.


PS.  Kapau 'oku fu'u loloa pea tu'usi atu ki he pepa hoko.