October 17, 2007                                        News You Can Trust!!                                      Volume 7

Ongoongo mei he 'Ikale Tahi 'i Falanise - 14 Sepitema 2007

Ko Quddus Fielea (Head Coach) mo e timi 'Ikale Tahi na'a nau tu'usi e kapakau 'o e 'Ikale Koula 'o 'Amelika.

Fakamalo

'Uluaki pe, 'oku fie fakahoko atu 'a e fakamalo 'a e Sea 'o e Poate, hono tokoni, faiako, pule, timi 'Ikale Tahi mo e kotoa e kau folau ki he Tonga kotoa pe he lotu mo e poupou ne mau lave ai 'o ikuna 'i he feinga tau mo 'Amelika.  Na'e fu'u mafana 'aupito 'a e Tonga kotoa pe 'i Falanise 'i he ikuna na'e fai, kae mahino kiate kimautolu, ko e 'ofa 'a Sihova 'o fakafou mai 'i ho'omou ngaahi lotu mo e hufia.  'Oua mu'a na'a tuku ho'omou manatua kimautolu ho'omou ngaahi lotu faka-famili.

Hange koia na'a mou mamata ki ai he Televisone, na'e ikuna 'ehe 'Ikale Tahi 'enau feinga tau uluaki 'oe fe'auhi RWC. 'Oku ou tui pe 'oku tatau ho'omou fiefia hena mo 'emau fiefia 'a kimautolu heni.

Fakafe'iloaki mai Konisela Tonga ki Pilitania ki he 'Ikale Tahi
Na’e 'a'ahi mai 'ae Konisela Fakalangilangi 'a Tonga ki Pilitania mo 'Iulope, Hon. Dr. Ngongo Kioa mo hono hoa 'o mamata 'i he va'inga 'ae fanau Tonga. 'I he hili 'ae va'inga, na'e fakafe'iloaki 'ehe Sea 'oe Poate 'Akapulu 'a Tonga, Sangster Saulala mo Dr. Tu'i Uata e fanau va'inga kihe Konisela, pea hoko atu ki ai mo hono faitaa’i ‘oe Konisela moe Timi, pea faka'osi'aki hono fakamalo'ia 'ehe Konisela 'ae tamaiki va'inga 'i he 'ikuna kuo fakahoko, fakataha mo 'ene talamonu kihe tamaiki va'inga 'ae 'Ikale Tahi 'i he 'amanaki teu va'inga moe Timi 'a Ha'amoa, 'Inglani moe timi 'a Saute 'Afilika. Na'e fakaafe'i ai pe foki 'e Dr. Ngongo Kioa 'ae timi 'a Tonga kenau fou ange ‘i ‘Ingilani ‘o fe’iloaki ai moe komiuniti Tonga ‘i ‘Ingilani, pea na’e tali lelei ia ‘ehe Pule, Faiako moe timi foki.

Tokolahi faufaua e kau poupou ‘oe 'Ikale Tahi
Na’e fakafuofua kihe kakai mamata ‘akapulu ‘e toko 24,000 tupu na’e tefua ‘ihe mala’e De La Mosson 'i Montpellier, Falanise ke mamata ‘ihe fepaki ‘ae ‘Ikale 'Uta ‘o ‘Amelika moe 'Ikale Tahi ‘o Tonga. Koe meimei peseti foki ‘e 80% ‘oe kau mamata na’e poupou ki Tonga. Ko tokolahi taha ‘oe kau poupou koe kakai ‘o Montpellier moe kakai Falanise moe kakai Tonga Falanise, Pilitania moe kakai Tonga ‘oku nofo ofi holo ‘i Falanise.

‘Oku ui pe foki ‘ehe kakai Montpellier ‘ae Timi ‘a Tonga ko ‘enau timi, pea koe feitu’u kotoa pe ‘i Montpellier tautautefito ki Clapier ‘oku tau fuka Tonga, pea koe kakai ‘oku nau ‘alu holo pe mo ‘enau fanga ki’i fuka Tonga. Koe feitu’u kotoa pe ‘oku lele ai ‘ae pasi ‘ae 'Ikale Tahi ‘oku tu’u e kakai kotoa ‘o ta’ata’alo mo kaikaila kihe timi. ‘I he taimi fakamalohisino kotoa pe ‘oku fonu e kakai moe ‘u mitia koe feinga ke faka’eke’eke ‘ae tamaiki va’inga mo kole 'autograph' kae ‘uma’a e kole vala fakamalohisino. Koe kakai ‘oe kolo ‘oku tatau tofu pe mo Tonga, ‘oku nau fu’u anga-fakakaume’a ‘aupito.

Finau Maka, Viliami Vaki moe toenga ‘oe tamaiki va’inga Falanise;
‘I he lolotonga e va’inga na’e mahino mo’oni pe ‘ae manakoa moe ‘ofa’i ia ‘ae tamaiki Tonga va’inga Falanise ‘ehe kakai Falanise tautau tefito kia Finau Maka, Viliami Vaki moe Suka Hufanga. ‘I he taimi kotoa pe ‘oku ala ai ‘a Finau Maka kihe pulu kuo tu’u kotoa e fu’u kakai ‘ia ‘o hopohopo longoa’a mo kaikaila kia Finau ke lele, pe tui'i. ‘Ihe taimi na’e fakahoko ai ‘e Finau Maka ‘ae ‘uluaki tata’o meihe kick-off na’e hange ‘oku fakasesele ‘ae fu’u sitetiume he tue mavava mo kaikaila kihe hingoa ‘o Finau Maka. Tatau pe moe tata’o fakamuimui taha na’e fakahoko ‘e Viliami Vaki, na’e ‘osi katoa e fu’u kau sio ‘akapulu ki ‘olunga ‘o kaikaila pe kihe hingoa ‘o Vaki. Na’e ‘ilonga makehe pe hono poupou’i ‘oe timi ‘a Tonga ‘ehe kakai ‘oe kolo, na’e a’u pe ‘o teuteu’i ‘ehe fanau ako meihe ngaahi ako ‘i Montpellier ha Sipi Tau ‘a ia na’e taa’i he half-time.

After Match 'Ikale Tahi mo e 'Ikale 'Amelika

Na’e fakahoko ‘ae after-match function kihe loto kolo ‘o Montpellier, ‘a ia na’e ‘i ai loua ‘ae ongo timi, Tonga mo USA na’e fakahoko ai pe hono fakahoko ‘oe ongo timi kihe kakai ‘e toko lauafe na’e ‘ihe loto kolo. ‘I he hili e ki’i ouau ko ia na’e loto taha ‘ae timi ‘ae 'Ikale Tahi ke fai ha fo’i hiva ‘e 2 ke fakafiefia’i ‘aki ‘ae kakai, na’e kau mai foki moe tamaiki va’inga Tonga he timi ‘a ‘Amelika kihe hiva ko ‘eni. Na’e fiefia lahi e fu’u kakai mo kaikaila MORE….MORE….MORE. Na’e hoko atu ai pe kihe kai efiafi moe faita moe kakai, pea moe fakamo’oni autograph.

'Ofeina taha pe timi 'Ikale Tahi

Faka’osi pe na’e lele he ‘u newspaper ‘o pehe koe Timi ‘a Tonga, 'Ikale Tahi koe timi ‘ofa’i lahitaha ia he RWC ko ‘eni. ‘Oku ‘ofa’i ‘ehe ‘u newspaper, TV, ‘u timi kehe, kae’uma’a ‘ae kakai Falanise. Koe taha ‘eni ha me’a fakafiefia kihe fanau va’inga ‘a Tonga ‘ae faingofua ‘ae ‘u me’a kotoa pe, koe’uhi ‘oku fakafaingofua ‘ehe kakai Falanise.

Talamonu mo e Tohi Fakamalo mei Tonga

Na’e toe fiefia lahi ‘aupito ‘aupito ‘ae fanau va’inga 'Ikale Tahi moe kau ‘ofisiale he ma’u mai e tohi mei he Palemia ‘o Tonga, Dr. Feleti Vaka’uta Sevele, koe fakamalo he ikuna na’e fakahoko ‘ehe fanau va’inga, mo talamonu mai pe kihe teu feinga tau mo Ha’amoa. ‘Oku hounga’ia mo ‘oatu ‘ae fakamalo tu’a
meihe Faiako, Pule, Kapiteni, moe toenga ‘oe Timi 'Ikale Tahi, kihe Palemia moe fonua homou poupou kihe fua fatongia ‘oku nau fai ke hiki e maa’imoa ‘akapulu ma'ae Tonga kotoa.

Faka’osi pe, koe fanau va’inga ‘eni moe kau ‘ofisiale ‘oku nau mo’ui lelei kotoa pe, pea ‘oku nau fie fakafolau atu ‘enau ‘ofa mo fakamalo he ngaahi tohi ‘ofa moe talamonu moe lotu kotoa pe ‘oku fai ‘ehe kakai ‘oe fonua.  'Oua mu'a 'e ngata heni, kae hokohoko atu ho'omou hufia kimautolu.

'Ofa lahi atu
Joh Fifita (Media Manager) moe Timi 'Ikale Tahi