Mou Lea kau Minisita

  Koe me'a ‘oku ‘asi mai ki tu'á ‘oku fakaaoao ‘ae Palemiá ‘ihe Kapinetí moe Pule'anga Tongá he ‘oku fai ‘ae me'a kotoape ‘oku loto kiaí. ‘Oku mahino ‘oku fai ‘ae Palemiá kihe ngaahi me'a ‘oku finangalo kiai ‘ae Tu'í. Pea ‘oku hange leva ‘ae toenga ‘oe kau Minisitaá koha kau pasese moe kauvaka ‘oku fakaongoongo ke fusi la pe tuku la, l˘ taula pe fusi taula ‘o fakatatau kihe angi ‘ae ‘Eikivaká pe koe Meti.

  Koe kau Minisitaá na'e fili pea fokotu'u kihe ngaahi lakanga ‘o fakatatau ki honau malohinga ‘i honau mala'e takitaha. ‘Oku ‘ikai koia pe ka koe kakai ako lelei, poto mo maama 'onau lava ai ke kau ‘i hono alea'i ‘ae ngaahi ‘isiu kotoape felave'i moe kakaí, mo'ui ‘ae kakaí, malu'i ‘oe kakaí pea ke fakatupulekina ‘ae nofo melino mo ma'uma'uluta ‘ae mo'ui fakasosiale mo faka'ekonomika ‘ae fonuá.

  Kuo ‘osi fakamo'oni'i ‘ae fakaaoao ‘ae Palemiá, ‘asili aí he kuo toki ‘asi mo'oni mai hono lanu totonú ‘aia na'e kei tuotuai pe kae ‘oua leva kuo ne ma'u ‘ae mafaí. Na'e ‘asi ia ‘ihe ‘ene ta'etoka'i 'o fulihi ‘ae fakamatala patisetí ‘ae Minisita Pa'angá. Koe me'a eni ‘oku ui koe ta'etoka'i tokua ‘oku laka ange ‘ene ‘ilo faka'ekonomiká 'ihe ‘ilo faka'ekonomika ‘ae Minisita Pa'angá. Kuo ne toutou fakamanamana'i ‘ae kau ngaue fakapule'anga ‘oku nau Taki mo memipa ‘ihe PSA tokua ‘e vavé ni pe hano fakamalolo'i kinautolu. Ko ‘ene ta'efie fakalelei moe kau Fakafofonga ‘oe kakaí he ‘oku ne fiema'u kenau tomu'a kofesio mo vete hia kihe maumau ‘oe 16/11 moe ha fua ‘ae ‘u me'a ‘oku ne faka'ali'ali mai ai ‘a ‘ene loto fakaaoao ‘ihe Kapinetí moe Pule'angá.

  Koe pango taha kuo a'u kiai ‘ae fonuá ‘ihe Taki ‘a Feleti Sevelé ko ‘ene hanga ‘o fakapulou'i ‘ae kakaí ke ‘oua tenau ‘ilo kihe ngaahi me'a ‘oku alea'i ‘ihe Falealeá moha toe ngaahi ongoongo fakapolitikale kehe ‘oku felave'i moe Pule'angá. Kuo ne tapuni'i ‘ae Letio moe TV Tongá ke ‘oua ‘e toe fakamafola mei ai ‘ae ongoongo Falealea angamahení moha toe ongoongo pe fakamatala fakapolitikale kehe. Koe me'a koe ‘oku fakamafola meihe Letio moe TV Tongá koe ngaahi fakamatala pe koia ‘oku loto ‘ae Pule'angá ke ‘ilo ‘ehe kakaí kae tanu kotoa hono toé. Koe ‘ulungaanga moe ngaue ma'ulalo taha ia ‘oku fai 'eha Pule'anga ‘oha fonua ko hono fakapulou'i ‘ae kakaí pea ta'ofi pe fakangatangata ‘ae fakamatala moe ongoongo ‘ihe fonuá ke ‘ilo kiai ‘ae kakaí. Kuo hoko ‘i Tongá ni pea ‘oku ta'engali moe Palemiá he ‘oku ne fakamo'oni mai heni ta koiá koe tangata taliangi ka ‘oku ‘ikai koha tangata Taki. 

  ‘Oku tui ‘ae Sio Fakaanga ‘ae Kele'á kuo taimi ke fai mo lea hake ha Minisita pe kau Minisita ke ta'ota'ofi ‘ae fa'ifa'iteliha ‘ae Palemiá. Pea kenau fakatokanga'i ko kinautolu ‘e hilifaki kiai ‘ae kakaí honau mamahí pea fakaanga'i ko ‘enau ‘ilo pe ‘ae me'a ‘oku halá kanau fakalongolongo pe. Tuku ‘ae ilifia kihe lakangá he koe teunga fakataimi pe ia ka ke ‘ofa ‘ae kau Minisitaá ‘o ilifia kihe mo'oní moe faitotonú he koe founga ia tene fakatau'ataina'i kinautolú.

  Ka neongo ‘ae ngaahi me'a ‘oku fakaanga'i atu ‘i ‘olungá ‘oku ‘iai pe ‘ae fiefia moe nekeneka ‘ae kakai tokolahi ‘oe fonuá koe'uhí koe loto lelei ‘ae Takí kae to hina ‘ae Pule'angá. ‘Oku totonu ketau fakamalo kotoa ai kia Feleti Sevele ‘ihe faifai pea ne toki ala atu ke fakahoko ‘ae ngaue ‘oku mataotao aí ‘aia ko hono to mo toli ‘ae hiná ‘o fakatau atu kihe maketi Siapaní. Ko Feleti na'e kau ‘ihe kau fuoloa pe paionia ‘oe uta hina ki tu'apule'angá pea pehe foki kihe Tu'ipelehaké (Mailefihi). Mou ‘eke pe kihe kau to hina ‘ihe ongo Kautahá ni ‘aia koe Squash Export moe MBF pea ‘e ma'u mei ai ‘ae faka'uto'uta kihe teu to hina ‘ae Pule'angá.

  Koe founga eni ‘e lava ke tokoni kihe pa'anga humai ‘ae Pule'angá ke fakalahi ‘aki ‘ae pa'anga meihe Tute moe tukuhau ‘ae kakaí. ‘E lava ‘ehe pa'anga hiná ‘o tata ‘ae mo'ua ‘oe no ki Siainá pea ‘e toe toto atu ‘o kapau ‘e lava ‘ehe Palemiá ‘o alea'i ke totongi fo'i hina ‘ae no ‘ae $118 miliona ‘oku laú. Pea toe hanga ‘ehe to hina ko ‘eni ‘ae Pule'angá ‘o totongi atu ai ‘ae $7 miliona na'e no ‘ehe kosilió kae toki tata ‘ehe kau to hiná ‘o to'o ‘ae 10¢ meihe kilo hina kotoape. ‘Oku ‘ikai foki totonu ke totongi ‘ehe kau to hina fo'oú ‘ae no ‘ae kosilio hiná moe kau to hina motu'á.