October 17, 2007                                        News You Can Trust!!                                      Volume 7

Manilala moe Maliuana

Tangata’eiki

‘Oku ou fakatumutumu ‘i he founga ngaue ‘a e kau polisi pea moe fakaehaua he famili Manilala ‘a e fonua ni.

Ko e ‘osi atu ‘eni hono puke ‘a e lau’iafe ‘oe kakai ko ‘enau lea fekau’aki mo ‘enau totonu ‘o fakahu pilisone. Ka ko ‘eni ko Sefo Manilala ‘eni ia kuo ma’u he kau polisi ia moe maliuana ‘a e me’a tene maumau’i lahitaha ‘a e to’utupu ‘oe fonua ko ‘eni. Koeha me’a ‘oku fai he fakamaau’anga moe kau polisi ko e talaange ke ‘alu fiemalie pe ki honau ‘api ‘o mohe he ngaahi sofa ne fakatau’aki ‘a e pa’anga ‘a e kakai masiva.

Kofe fakamaau totonu? Ke fakahu pilisone ‘a e kakai ‘o mohe he la’isima he mahina ‘e 2 ko e to’o ‘a e kapapulu ko ‘enau fiekaia he lahi ‘a e masiva ko e ngaue ‘a e pule’anga ko ‘eni. Pea fakahu pilisone mo ‘emau kau fakafofonga ko e kumi ‘emau totonu. Pea ko e tangata ‘eni kuo ne fai ‘a e hia fakalilifu ko e tufa ‘oe maliuana pea talaange ke ‘alu pe ‘o mohe honau ‘api pea ‘oatu moe ongo sotia ke le’ohi. Kohai ia ke toe le’ohi ‘o hange ko e Tu’i? Ke fai hia pea fakapale’i ‘o hange ha Tu’i.

Kau polisi moe pule’anga kuo taimi kemou ofi mai ki he kakai he ko e me’a ‘eni ia ‘oku hake ai ‘a e kataki. Ke hanga he kau Manilala ‘o kai pa’anga ‘a e kakai he ‘uhila pea nau ngaue’aki ‘a e Tu’i ki he’enau fiema’u fakafo’ituitui pea nau toe omai ‘eni ke tufa ‘a e Maliuana ke tamate’i’aki ‘emau fanau pea ko e me’a ‘oku mou fai ko hono fakapale’i. Kuo ngaue’aki he kau Manilala ‘a e fakamaau’anga, kau polisi moe kau sotia.

Kuo taimi ke fokotu’u ‘a e pule’anga fo’ou na’a hanga he kau Manilala ‘o faka’auha ‘a e fonua ni.

Faka’apa’apa atu

Tala kei Kapa