October 17, 2007                                        News You Can Trust!!                                      Volume 7

Fainolo ongo timi he pulu 'a Tonga

Falanise - Ko e me'a malie ia ki he kau fokotu'utu'u 'oe fe'auhi ipu 'a mamani ko e a'u ki he fainolo ko e ongo timi tena tau'i 'a e ipu ko e humai mei he pulu tatau 'a ia ko e pulu ia ne kau kiai 'a e 'Ikale Tahi.

Ko e ongo timi ko Saute 'Afilika mo 'Ingilani pea na'a tau mamata kotoa pe he malava 'a e 'Ikale ke fakafepaki'i 'a e ongo timi ko 'eni. Na'e 'i ai foki fehu'ia 'a e pulu ko 'eni he na'e tomu'a fakahu 'a Tonga he pulu kehe pea ko e ofi koia ki he fakahoko 'a e fe'auhi kuo toe liliu 'o tau kau he pulu 'a 'Afilika, 'Ingilani, Ha'amoa mo 'Amelika. Pea kuo mahino pe he a'u ki he fainolo ta ko e pulu fefeka taha pe 'eni ne kau kiai 'a Tonga.

Ko e tu'u koia he 'aho ni ko e vaofi taha ha kai moe timi 'a Saute 'Afilika ko e 'Ikale Tahi 'a ia ne malohi'aki 'a e fo'i kai ko e poini 5. Pea 'oku tui 'a e tokolahi he mala'e 'akapulu 'oku ngalingali ko Saute 'Afilika tenau ikuna 'a e ipu ka 'oku kei tu'u mai va'e 'a Johnny ko e mahafu faka'osi ia 'a 'Ingilani.

Ko e toe me'a malie 'e taha 'oku kei tu'u pe tau koia 'a e 'Ikale Tahi mo Saute 'Afilika ko e taha 'oe va'inga malie taha ia he fe'auhi Ipu 'a mamani 2007. Pea 'oku 'i ai 'etau talamonu ki he ongo timi fakatou'osi 'i he 'amanaki kena tau'i 'a e Ipu 'a mamani 2007 mo 'oatu aipe 'etau popoaki "mana hena 2011."