October 17, 2007                                        News You Can Trust!!                                      Volume 7

Kuo polo'uto e faihala, hikisia mo e siolalo he kau taki 'o Tonga

Ki he 'etita,
Kuo polo'uto e faihala, hikisia, siolalo, fieme'a, ta'efieauna, ta'etoka'i, ta'efietukulolo, ta'efielotoma'ulalo, ta'etokanga mo e faiangahala 'i he kau taki 'o Tonga. Tangata Tonga mo e fefine Tonga 'oku kei veiveiua ho'o fakakaukau fekau'aki mo e feinga ke liliu hotau fa'unga pule. Ko e tangata Tonga pe au hange ko koe, koe talu 'eku tupu hake mo 'eku fanongo ai pe ki hotau tukufakaholo. Ko e hapai ai pe kia hou'eiki mo ha'a tu'i neongo e tu'utamaki mo e lahi e kavenga kehekehe kaekehe pe ke lava e fatongia kate ngali tangata. 'Oku to'ukai pe mo hono lohu pea 'oku fakataimi pe me'a kotoa he ko e anga ia 'etau nofo he mamani 'oku tau 'i ai koe me'a kotoa pe 'oku 'hoko 'oku 'i ai hono 'uhinga he 'oku fakataipe 'ene hoko, mo hono 'uhinga ki ha mo'oni 'oku 'ikai toe le'eia.
Ko e feinga ko 'eni 'oku fai ki ha Tonga 'oku toe sai ange 'i hono fakalea mahino ngofua. Ko e si'i pa'anga 'oku laku faka'aho ki Tonga mei ha foha, 'ofefine, fa'e pe koha tamai mei he ngaahi fonua lalahi 'o mamani ko e pa'anga ia me i he ngaahi fonua temokalati pea ko e temokalati 'oku mo'ui ai hotau kakai tokolahi 'i mamani. Tau ki'i sio ange ki he pule'anga fakatu'i 'i he tu'unga lolotonga ni pe ko e ha e me'a 'oku hoko ai 'ikai koe takitaha feinga pe ma'ana. Ko e ki'i fonua ko Tuvalu 'oku lau miliona enau pa'anga 'oku ma'u mei he 'enau tu'unga satelaite ko e .tv ka 'oku ha Tonga ia, ma'u tokotaka pe ia 'e Pilolevu.
Ki he fanau tupu 'o Tonga mo u toe ki'i 'a'a ange pea mou sio loloa ki homou kaha'u he ko kimoutolu 'a e kaha'u 'o e fonua. 'E lava 'e he temokalati 'i ha taimi totonu mo e kuonga totonu ke lava 'e ho'o totonu 'o ma'u ai ha vahe ho'o mou matu'a mo ho'o mou ngaahi kui 'o hange ko mia 'oku hoko 'i he ngaahi fonua muli. Ke hanga he'e pule'anga 'o 'oange ha vahe welfare 'a e matu'a ka e tuku a 'a e fakauouo'aki 'ehe kau taki e pa'anga tukuhau 'a e kakai. 'E lava 'e he temokalati 'o fakapaaki e fu'u fo'i hangatamaki tangilengila kuo fuoloa ta'u e 'eu holo moe kau taki 'o Tonga 'oku ui koe faihala.
Ko e tu'u 'a e lao 'i mamani 'oku tatau pe ki he taha kotoa. Tonga pe taha he kolope 'oku kehe atu, kehe pe lao ia kihe kakai , hou'eiki moe tu'i. Tau sio ki 'Amelika lahi ko 'e ne ma'u pe palesiteni koe nonofo kovi ko ene fakafisi ai pe 'ana. Ko ene ma'u pe ha lele lahi 'aha minisita kuo faka'ilo pe ko hono fakahifo mei he lakanga.Ko 'ene ngaue hala 'aki pe 'e ha mp ha pa'anga 'oku tuku ki tu'a. 'Oku 'i ai moe kakai 'oku fa'a ui 'ehe kau papalangi ko e kau whistle blower(tala e faihala). Ko Tonga ia 'oku ui ia ai ko e kau blow jo pe ko hono fakatonga ko e kau poupou ki he faihala.
Tangata mo e fefine Tonga ko e fili 'oku 'a'au ia pe ko ho'o poupou ki he temo pe ko ho'o poupou ki he kau komo. Kau ki'i tokoni atu 'oua na'a mou tokanga ki he fakamanamana 'oku fai mei he pule'anga he 'oku mau mofele holo 'i mamani pea 'oku lea 'aki e taimi 'oku lea ai e pulu mofele 'i 'Amelika, 'Aositetelia moe 'u fonua ha 'asi ange ai e kau fakamanamana ko 'ena.
Tau toki sio,
Ma'upale.