October 17, 2007                                        News You Can Trust!!                                      Volume 7

Fale ‘oe Tu’i moe Miliona ‘a e fonua

Tangata’eiki,

Ko e pa’ulu ‘a e ngaahi fale ‘oe Tu’i he ngaahi fonua ‘Iulope ne makatu’unga kotoa ‘i he’enau siokita ‘o nau fa’o ‘a e koloa moe pa’anga ‘oe fonua kae faingata’a’ia ‘a e kakai.

Ko e ‘aho ni kuo ‘asi ‘a e natula koia he fale ‘oe Tu’i Tonga, ‘i he’enau ma’u ‘a e ngaahi koloa ‘oe fonua. Nau ma’u ‘a e lau miliona he ‘Uhila, Satelaite, ‘initaneti, Duty free, Vakapuna moe ha fua.

Pea kuo ha’i kapa mo’oni pe honau la’e ‘i he ‘ikai tenau maa mai ki he kakai ‘oku ‘anautolu ‘a e koloa moe pa’anga. Ko e me’a ‘eni ‘oku ui ko e kaiha’a he ho’ata malie. Pea ko honau ngaahi nima kuo nau langa fale lalahi mo pisinisi lalahi he fonua ni. Pea ‘oku kau ai ongo Manilala pea ‘oku vave moe ‘asi hake ‘a Saia Moehau moe ngaahi fale ‘i lotokolo. Ko e tokotaha kotoa pe ‘oku poto he fakahekeheke’i ‘a e fale ‘oe Tu’i ‘oku nau tu’umalie.

Tupou V mo Pilolevu, ‘ai mo ki’i ‘ai ha me’a he ‘ulu kae tuku ‘a e fakavaleloi. Kemo kai melie ‘oe fonua pea mo feinga hanga kehe mei he palopalema ne hoko. Kuo maumau ‘a Nuku’alofa ko e anga ia homo taki siokita he fonua ni, pea ko hono ola ‘eni. Ko e teu langa ‘a Nuku’alofa ‘oku ‘ikai tonu ke fai ha noo moe faingata’a’ia kakai. To’o mai pe silini mei ngaahi pisinisi ‘a Tupou V mo Pilolevu he ko e koloa ia ‘a e fonua kae tuku hono misi ‘a e toto ‘a e kakai.

Tupou V mo Pilolevu - mo lau ‘a e hisitolia pea mo ako ai. Ko Satamu, Hitila, Musolini, Sa Lusia (Tzar), Kaisa Siamane (Kaiser), Tu’i Falanise, Marcos ‘o Filipaine moe kau taki kehe ‘oku mou natula tatau, ne nau iku kotoa ‘o tautau fakapeka.

‘Ofa he kakai, pea ‘e ‘ofa ‘a e kakai ‘ia moutolu.

Faka’apa’apa atu

Kainanga ‘oe fonua