October 17, 2007                                        News You Can Trust!!                                      Volume 7

Palemia Ma’ulalo taha ‘a Tonga

Tangata’eiki

Kataki paaki atu ‘emau fakakaukau mei he’emau ha’ofanga inu kava fekau’aki moe palemia.

Ko e lakanga palemia ko e lakanga ne faka’apa’apa’ia pea ko e tokotaha ne heka he sea koia ne mo’oni ‘a e lau taau pe lei moe tofua’a. He na’e ‘ange’ange mahu’inga ‘a e lakanga moe molumalu ‘a e sino na’ane ma’u. Ka ko e ‘aho ni ko e toki a’usia ‘eni ‘e Tonga ha palemia ma’ulalo mo’oni hotau hisitolia.

Na’e ‘amanaki lahi ‘a e kakai ko Feleti ‘e tu’umo’unga ka kuo kai he kumaa ia ‘etau ‘amanaki. Ko e hu atu pe ‘a Feleti ki he pule’anga pea fai ai ‘a e ‘uluaki strike ‘a e kau ngaue fakapule’anga hotau hisitolia. Taimi pe na’e hoko ‘o palemia pea ko e fuofua vela ia ‘a Nuku’alofa. Ko ‘ene taimi ‘e lekooti he fakahu pilisone lahitaha ‘a e kakai mo faka’ilo lahitaha pea toe kanoni’aki ko e toe mo’ua lahitaha ‘eni ‘a e pule’anga.

Feleti Sevele kuo ‘ilonga ho ‘alunga he fonua ni. Kamata pe ho hu ki he poate pea mate poate koia kae lava lelei langa ho fale. Ko ho ‘asi pe hina mamahi kau to hina si’isi’i totongi kae tu’u lelei ho ngaahi pisinisi. Pea kuo ke hanga ‘o fakakuihi ‘a e mata ‘a e Tu’i kene fili koe keke palemia ka ko e me’a ‘oku mahino mai ko ha taha pe temou vaofi ‘e fihia.

Me’apango ko e mele hisitolia kau palemia ‘oe fonua ni he ngaue motu’a kafi ko ‘eni. Malimali kaka pea ko e toki mo’oni ia lau ko e katakata ‘a nifo tea.

Pea ko ‘eni kuo ke fokotu’u mai ketau fili fakavahe, Feleti fakasi’isi’i ho vale mo ho ta’etoka’i ‘a e kakai. Kuo ke ‘osi ‘ilo lelei ka tuku mai ke ‘ai atu ha lau ‘a e kakai temau loto p eke fai founga fili lolotonga he ‘oku mau kei fiema’u pe ‘emau kau fakafofonga lolotonga kenau fakafofonga’i mautolu.

Pea tuku ho feinga ke fakatonuhia’i ho fakaloloa ‘a e fakataputapui pea toho atu mo Faiva Tu’ifua. ‘Ai ai mo Faiva ko e talu pe ‘ene malolo mei he polisi moe maumau ‘a e tapili.

Feleti ko e fakama’opo’opo ‘a e loto ‘a e kau kavatonga mei he Mosimosi ‘o a’u mai ki ‘uta ni ‘oku mau loto ke li koe kitu’a mei he pule’anga he ‘oku ke fakangalivale’i ‘a e fonua.

Faka’apa’apa atu

Kau inu kava

Vahe Hahake