Kautaha

'Oku fiefia ma'u pe ho'omou Kautahá [PSA] ke talanoa atu kiate kimoutolu pea ke 'oatu 'ae ngaahi ongoongo fakamuimui taha kihe 'etau langa ngāué pea moe ngaahi me'a (issue) 'oku mau tui 'oku mahu'inga ketau 'inasi mo ngāue kotoa kiaí. 'Ihe taimi tatau 'oku toutou fakamanatu atu pe 'ehe Poaté ke 'oua na'a tuku 'etau fehūfia'akí pea mo fepoupou'akí. Kamata ma'u pe moe 'Eikí ho 'aho ngāué pea 'e mahino ngofua 'oku 'ikai teke tokotaha pē 'ihe fononga'anga 'oku ta muiá. Kihe lelei fakalūkufua 'ae kau ngāué moe fonuá 'ihe funga 'oe tu'u fakataha, ngāue fakataha kihe vahevahe taaú moe totonú.

Tuku keu toe fakamahino atu 'ae 'uhinga na'e fokotu'u ai 'ae Public Service Association (PSA). Koe PSA, 'oku lesisita ia 'ihe Pule'angá koe kautaha 'ae kau Ngāue Faka-Pule'angá. Ko hono kau mēmipá 'oku fa'ahinga 'e 3. Koe 'Uluakí, koe kau memipa 'oku nau lesisita mo lī 'enau tukuhau koe $2 'ihe vahe kotoapē pea 'oku nau 'atā ke kau kihe fili 'oe Poate Pulé pe koe (Executive Board). Koe kalasi leva hono Uá, koe kau vāhenga mālōlō, [pension pe redund] ka ko honau lotó 'oku nau kei tukupā kakato pe kenau poupou kihe PSA pea mo 'ene ngaahi taumu'a ngāué. Koe kalasi hono Tolú, koe kau mēmipa ta'elēsisita, ka 'oku nau poupou fakalongolongo pe (silent supporters).

Koe fatongia tefito 'o 'etau kautahá- Ke tokanga kihe ngaahi me'a tene langa hake 'ae lelei fakalukufua 'ae kau Ngāue Faka pule'angá. Koia 'ihe uiké ni, 'e fai 'ae tokanga mavahe kihe ngaahi me'a 'oku ne uesia 'ae Memorandum of Understanding (MOU). Koe MOU na'e fakamo'oni'i ia 'ihe vaha'a 'oe Pule'angá pea moe Kautaha 'ae Kau Ngāue faka-Pule'angá 'ihe 2005. Koe kupu eni 'e Ua 'oe MOU 'oku to'o mai ke fai hano vakai'i fekau'aki moe ngaahi lāunga kuo a'utaki maí.

Ke toloi hano toe hilifaki ha fa'ahinga tukuhau vāhenga pe koha toe fakalelei kihe vāhenga 'oe kau ngāue faka-Pule'angá kae 'oleva ke kakato 'ae ta'u 'e 2.
Ke 'oua 'aupito na'a 'iai ha fa'ahinga fakahoko ngāue 'ae Pule'angá 'e hā mei ai 'oku/na'e 'iai ha filifilimānako pe ko hano tautea 'oha taha na'e kau 'ihe tukungāue 'oe 2005 (discrimination).

'Oku tui 'ae Poate Pulé 'oku mahu'inga ke fai hano vakai'i 'ae aleapau pe Memorandum Of Understanding (M.O.U.) he 'oku hangehangē 'oku fai 'ae pau'u 'o monuka ai 'ae aleapaú ni. 'Oku tupunga 'ae ngaahi mahamahalo ko ení, tupu meihe lahailahi 'ae lāunga meihe kau mēmipá 'ihe ngaahi feitu'u ngāue'anga 'e ni'ihi 'o pehē kuo tāpalasia pea 'ilonga 'aupito hono teketeke'i holo kinautolú pea 'oku holo ai honau ivi fie ngāué.

'I hono fakamā'opo'opo 'oe ngaahi lāungá 'oku lahi taha hono pa'usi'i (breach) 'oe 'aleapaú 'ihe ngaahi me'a ko 'ení,

Kuo laka hake 'ihe 75% 'oe kau mēmipa 'oe PSA 'oku te'eki ke ma'u 'enau annual Increment hili 'ae ta'u ko 'eni 'e 1 koe'uhí koe tu'utu'uni 'ae Komisoni kihe kau Ngāue Faka-Pule'angá [PSC].
Kau heni moe Acting Allowance, pea moha promotion pe koha ngaahi fokotu'u lakanga fo'ou (new appointment), vahe atu 'oe ngāue overtime. Na'e fakahoko 'ae tu'utu'uni koení 'ihe konga kimu'a 'oe ta'u kuo 'osí (2006) ke ta'ofi fakataimi 'o toki fanongonogno koe'uhí koe tōlalo 'ae tu'unga faka-'ekonōmika 'ae fonuá.

'Oku tali lelei pe 'ehe Poate Pule 'ae PSA 'ae tu'utu'uní ka koe me'a fakalolomá 'oku 'ikai fakahoko tatau (equal treatment) kihe taha Ngāue Faka-Pule'enga kotoapē. 'Oku 'osi fakapapau'i 'ehe kau mēmipá 'o līpooti kihe Poate Pulé 'oku 'osi ma'u 'ae annual increment 'ae ni'ihi kau ai 'ae Potungāue Polisí moe Sōtiá neongo 'oku 'ikai kenau kau 'ihe PSC kae kei sisina tu'u 'ae ni'ihi tokolahi 'oe kau Ngāue Faka-Pule'angá.

Koe Acting allowance 'oku 'osi fakapapau'i koe Acting 'ae level 2 'ihe level 1 'oku ma'u kakato pe 'enau acting allowance 'aia koe toenga 'oe ngaahi level ma'ulalo angé ko 'enau acting allowance 'oku hala'atā ha fo'i tenali tenau si'i ma'u 'o a'umai kihe 'ahó ni (faka'ofa honau lohiaki'í…..).

Koe new appointment kuo tokolahi 'ae kau Minisitā kuo 'osi fokotu'u fo'ou, kau kiai pea moe kau fale'i 'ae Palēmiá hangē ko Lopeti Senitulí, pea mo 'ene kau ngāue pe hangē ko hono 'omai 'o Kalafi Moala, Kitione Maile, pea moe kakai kehe pe, pea pehē kihe kau CEO fo'ou 'oe ngaahi Potungāué mo honau ngaahi tefito'i vāhenga fo'ou 'aia 'oku meihe 4 mano kihe 6 mano. Kau Sōtia fo'ou 'e toko 200, pea neongo 'e tali mai 'ehe Pule'angá na'e 'ikai kenau kau kinautolu 'ihe M.O.U ka 'oku māhino pe koe peesi pa'anga tatau pe 'oku vahe kotoa mei ai 'enau fakamolé pea kau kiai moe pa'anga na'e kole mai mei muli 'ihe hingoa 'oe Pule'anga Tongá.
Koe vahe overtime kuo 'osi mahino mai na'e 'osi vahe overtime 'ae ni'ihi tokosi'i 'o kau ai 'ae Potungāue Custom, Quarantine pea moe kau ngāue kehe pe kae faka'ofa pe 'ae toengá hangē koe Potungāue Mo'uí, 'o a'u kihe kau ngāue na'e 'overtime he me'afaka'eiki 'ae La'ā kuo unga fonuá, Tupou IV (kau faka'uli, kau kalake, pea moe ngaahi level ma'ulalo angé).
Ko hono fakahiki ta'e'uhinga 'oe kau Ngāue Faka-Pule'anga 'e ni'ihi meihe 'enau ngāué kiha Potungāue kehe.
Fakamālōlō'i fakataimi moha ni'ihi, tohi fakatokanga kiha fa'ahinga koe'uhí ko 'enau kau 'ihe PSA.
Koe ngaahi promotion kuo 'osi fakahokó 'oku lahi taha pe hono foaki kihe kau ngāue na'e 'ikai kenau kau 'ihe tukungāué pea toe ui mai moe fa'ahinga mei tu'a.

Koia 'oku fai hano tānaki 'ae ngaahi fakamo'oní ke fakapapau'i 'ae mo'oni 'oe ngaahi lāungá ni. 'Ihe 'ene peheé 'oku mahu'inga ke ke fetu'utaki mai kihe Poate Pulé ketau talanoa mo fai ha femahino'aki 'o kapau 'oku lomekina mo tukunoa'i ho'o totonú 'ihe ngaahi Potungāue 'oku ke lolotonga ngāue aí kae fai hano fakakaukau'i na'a malava ke fai ha tokoni atu. Manatu'i ma'u pe kau mēmipa, koe taha 'ae ngaahi 'uhinga tefito na'e fokotu'u ai 'ae Kautahá ni ke tokoni ke fakalelei'i 'ae tu'unga fakangāue fakalūkufuá. 'Ihe 'ene peheé 'oku mahu'inga ketau felōngoaki ma'u pe ketau maheni mo femahino'aki. Koe founga ia 'e fetafeaki māfana ai hotau ivi ngāué mo fakalakalaka kimu'a.

Ko 'ene maau mālie 'ae ngāue 'ae Poaté kihe me'á ni pea tetau hoko atu leva kihe sitepu hokó 'o hangē koia na'a mou lau ai 'ihe uike kuo 'osí koe fakatonutonu kihe Fakamaau'angá.

Lau ma'u pe 'ihe KELE'Á moe Tongastar website (www.tongastar.com) 'ihe uike kotoa keke 'inasi 'ihe ngaahi ongoongo fakamuimui taha kihe langa ngāue ho'omou kautahá. Ki ha'o faka'eke'eke fetu'utaki mai kihe telefoni fika 52-899.

In Unity and Solidarity.

Mei ho'omou Poate Pule