October 17, 2007                                        News You Can Trust!!                                      Volume 7

Ko Ho’o Ngaahi Totonu ‘i he Ngaue‘angá, ‘Oku Mahu‘inga ke Alea‘i

(Your Rights at Work are Worth Fighting For)

Kau Memipa, ‘oku ‘iai ‘etau ngaahi totonu ‘ihe Ngaue‘anga na‘e ta‘u lahi mai hono lolomi pea ‘oku kei langomia ‘ae ni‘ihi, ka “tau longo pe ‘ihe ‘etau ‘ofa fonuá, faka‘apa‘apa‘i hotau Tu‘í, Hou‘eikí mo hotau kau Takí pea tau kātekina pe ‘ae ngaahi mamahi ‘ihe Ngāue‘angá,” ‘o hangē koe lea na‘e fai ‘ehe Minisitā Lao ‘oe taimi ní, ‘Alisi Taumoepeau, ‘ihe tukungāue ‘oe 2005. Pea tālunga mo ‘etau ikuna‘i ‘ae fo‘i fuhu mahu‘inga koiá pea mo‘oni ai ‘ae lea ‘ae kau Papālangí, “Your Rights at Work is Worth Fighting For.” ‘A ‘eni ia ‘oku tau kei lave monū ai mo hotau ngaahi Famili, Kāinga, Siasi, Kolo moe Fonuá fakalūkufua he fakalelei vāhenga na‘e fakahoko ‘ihe ‘etau Fakamo‘oni Aleapau Femahino‘aki (MOU) moe Pule‘angá ‘i Sepitema 2005. Koe taumu‘a mahu‘inga eni ki ho‘omou Kautahá ketau fuhu‘i ‘etau ngaahi totonu ‘oku kei langomia ‘ihe Ngāue‘angá pe ha tapa pe. ‘Oku ake ‘ae manatu kihe me’a ‘a Takeivulaí ‘o fakamanatu ‘ae lea ‘a Mrs Roosevelt – ‘Oku totonu ke ‘oua na’a toe ta‘ofi ‘ae fetokoni‘aki ‘ihe ngaahi taimi pehe ní.- Because when you cease to contribute you begin to die.

‘Oku ‘amanaki foki ke ‘osi ‘ae MOU kihe faka‘osinga ‘o Sune ‘oe ta‘u ní pea lolotonga ‘a ‘etau kei fakaongoongo kihe kakato koia ‘ae Konga (Phase) 3 ‘oe tu‘unga vāhenga fo‘ou koia ‘oku ‘amanaki ketau hoko atu kiai ‘i Suilaí, ‘aia na‘e pehē ‘ehe Pule‘angá ‘e toe lelei ange ia ‘ihe 60, 70, 80%. ‘Oku tau fakame‘apango‘ia ‘ihe ngaahi ongoongo kuo tuku mai ‘ihe Letiō moe T.V Tonga moe Nusipepa Taimi ‘o Tongá ‘ae lea ‘ae tangata‘eiki Palēmiá fekau‘aki mo ‘etau MOU ‘i Vava‘ú, tokua te tau toe foki kihe me‘a motu‘á (‘aia koe ‘ikai ‘iai ha 60, 70, 80%, he koe toe hā ‘ae me‘a motu‘a?) pea moe toe tuli tonuhia ‘oku fai ‘ehe ‘ene Siana Faiongoongo ko Lopeti Senitulí, tokua na‘e ‘ikai ha lea pehē ‘ae Palēmia ‘i Vava‘u pea ‘oku faipau (committed) ‘ae Pule‘anga kihe MOU.

Kau Mēmipa ‘oku mau fie fakahoko atu heni ‘oku LOI ‘ae me‘a na‘e tuku mai ‘ehe Siana Faiongoongo ‘ae Palēmiá ‘ihe uike kuo ‘osí ‘o pehē ‘oku faipau ‘ae Pule‘angá kihe ‘etau MOU pea ‘oku totonu foki ketau fakatokanga‘i koe tokotahá ni ‘oku ‘ikai ke ngāue fakapule‘anga kene ‘omai ha ongoongo faka‘ofisiale ketau tui atu kiai. Koe ngaahi me‘a pe ‘oku tau tui kiaí koe ngaahi Tu‘utu‘uni kuo fai ‘ehe Kapinetí moe ngaahi lea ‘oku tuku mai ‘ehe kau Takí moe kau Ngāue Mā‘olunga ‘ae Pule‘angá, kae ‘ikai koha siana faiongoongo kuo haea lau ‘aho (daily hire) ‘ehe Palēmiá he ‘oku ‘ikai fai ha falala pe tui ‘oku ‘iai ha‘ane ‘ilo fe‘unga kihe ngaahi me’a ‘oku ne fa’a ‘omai kau kihe ngāue ‘ae Pule‘angá, pea ‘oku fakatupu longoa‘a ‘ene fa‘a lea ‘ihe me‘a ‘oku ‘ikai totonu ke lea aí.

Kuo ‘iai ‘ae ngaahi Kupu ‘oe MOU kuo fakalavea‘i ‘ehe Pule‘angá pea ko hono aofangatukú ‘e toki fakamaau‘i ia ‘ihe Fakamaau‘angá. ‘Oku ‘amanaki ke fakahū atu ‘etau kole kihe Fakamaau‘anga Lahí ke fai ha “Judicial Review” ‘oe Tu‘utu‘uni na‘e fai ‘ehe Kapinetí ‘i Fepuelí ‘o e 2006 ‘o ta‘ofi ‘etau ngaahi monū‘ia na‘e totonu ke ma‘u ‘ihe tu‘unga vāhenga motu‘á (increments, acting allowance, overtime, etc) talu mei Fepueli 2006, kae foaki pe ‘ae ngaahi monū‘ia ia ‘ae kau ngāue ‘ihe Pule’angá ‘ihe Kulupu na’e ‘ikai ke kau ha’anau fo’i tokotaha kihe tukungāue ‘oe 2005 hangē koe Potungāue Sōtiá moe Polisí. Na‘e ‘osi fai ‘ae ngaahi fefaitohi‘aki ‘ihe vaha‘a ho‘omou Poate Pulé moe ‘Ofisi ‘oe Palēmiá moe Komisoni ‘ae kau Ngāue Fakapule‘angá ‘ihe ta‘u kuo ‘osí ‘o fakahā kiate kinautolu ‘etau ta‘efiemālie kihe ‘enau maumau‘i ‘etau MOU ‘aki ‘ae fakae‘a mai ai ‘ae ‘ikai tenau fai tatau ‘enau tufa monū‘iá kihe tokotaha kotoa ‘oku ngāue mo vahe meihe peesi pa‘anga ‘ae Pule‘angá. Na‘e ‘ikai kenau ‘omai ha tali fakafiemālie pea tuku ā ke toki aofangatuku ‘ehe Fakamaau‘angá ‘ae fakatonutonu ko ení. Your Rights at Work is Worth Fighting For!!

Talamonū

‘Oku ‘oatu heni ‘ae talamonū ‘ae PSA kihe Fanau kotoa meihe Kolisi Tongá na‘a nau kau ‘ihe hopo moe fakatonutonu koia tu‘unga ‘ihe me‘a na‘e hoko ‘ihe 2005 lolotonga ‘ae tukungāué ‘i ‘Atelé. Fakafeta‘i kihe ‘Otua Mafimafí ‘ihe ‘ene kau mai o foaki ho‘omou totonu. Pea neongo kuo ‘i ai ha fa‘ahinga ‘iate kimoutolu kuo mole homou taimi ako ki tu‘apule‘angá tu‘unga he toutou toloi ‘a ho‘omou hopó. This is not the end of the world. ‘Oku kei ‘i ai pe ha taimi ke hoko atu ai e feinga. ‘Oku mau fakamālō atu kiate kimoutolu mo homou ngaahi familí ho’omou poupou kihe totonú. Fakatauange ke fakamonū‘ia‘i kimoutolu ‘ehe ‘Otuá ‘ihe toenga ho‘omou feinga ako ‘oku faí. ‘Oku mau ‘ofa lahi atu kiate kimoutolu. Ko mo‘oni mo totonu tene fakatau‘atāiana‘i kitauá.

‘Oku kei lahi ‘ae ngaahi me‘a ke fakahoko atu mei ho‘omou Poate Pulé, ka ‘oku pule pe kolomú, koia te tau toki hoko atu ‘ihe uike kaha‘ú kihe ngaahi founga fakahoko ‘oe ngaahi lāungá moe fokotu‘utu‘u ho‘omou PSA ke teke ‘a ho‘omou lelei faka‘ekonōmiká ke tokoni ki homou ngaahi famili, Siasi moe Sōsaieti. Ka ‘oku mou fiema‘u ha toe fakamatala pe tokoni pea ke fetu‘utaki mai kihe fika telefoni 52-899 kae ‘oua leva ke fokotu‘u hotau ‘ofisí. ‘Oku kei ‘atā ‘ae lesisita kihe PSA moe Credit Union ‘ae PSA. Lau ma’u pe ‘ihe KELE’Á moe Tongastar website (www.tongastar.com) ke ke ‘inasi ‘ihe ngaahi langa ngāue ho‘omou Kautahá.

Faka’apa’apa atu,

In Unity & Solidarity