KAUTAHA

KAUTAHA ‘A E KAU NGĀUE FAKAPULE‘ANGA (PSA)

Kau memipa, ‘oku tau fakamālō mo fakafeta‘i ki he ‘Eiki ‘i he taulama hao kuo fai ma‘akitautolu ‘o tau a‘usia lelei e ta‘u fo‘ou ni. ‘Oku tau fakafeta‘i kotoa ‘i he fakakoloa ko ia he lave monū aí mo hotau ngaahi fāmilí. Fakafeta’i e fakakoloá, Fakafeta‘i e foaki ta‘efilifilimanakó. Fakafeta‘i e tā sipinga lelei. ‘Oku vaka atu e ‘ofa ho‘omou Poate Pulé he foaki he fakakoloa ko ení pea ‘oku mau fakatauange ‘oku tau ‘inasi tatau ‘i he tapuaki mo e mo‘ui lelei ke hokohoko atu ho‘omou faitotoivi homou ngaahi fatongiá ‘o kei fakataumu‘a’aki ai pe ‘a e Fakamaau Totonuu, Pule Lelei mo e Vahevahe Taau ‘o tatau ai pe pē ko e hā ‘a e tu‘unga ‘oku ke ‘i ai he Ngāue‘angá pe Sosaietií. ‘Oku ‘ikai puli e mana ‘o e kamata‘angá ko e ta‘u fo’oú, pea ko e ngaahi ha‘aha‘a ‘o e fonongo‘angá mo e ngāue‘angá ‘oku hoko ia ko e ‘ahi’ahi ki ho’o tuí mo e falala ki hotau ‘Eikí. Ko ho ‘o tuí te ne fakatau’ataina’i kitaua. ‘Oua na’a ngalo, ko e leleí mo e langilangi ‘oku ‘a ‘Ana kotoa ia, ka ko e tapuaki te tau ‘inasi kotoa ai mo e fonuá.

Kau Memipa, tuku ke mau ngaue‘aki e faingamālie ni ke fakahoko atu e ‘ofa mo e popoaki talamonū mei he Palesitení, Dr. ‘Aivi Puloka. Neongo e vāmama‘o ‘oku ‘ikai ha tu’atamaki he ‘oku māhino pea uhu ‘i loto ‘iate kitautolu ‘oku tau taotaha pe ‘i he’etau ngaahi fakakaukaú ‘i he ngaahi me’a ke lelei fakalukufua ki he kau Memipa mo e Fonuá. ‘Oku ne fakamālō atu kiate kimoutolu kotoa. Mālō e fai faka’utumauku homou nagahi fatongiá, ‘Oku ne hufaki atu pe kimoutolu he’ene ngaahi houa lotú pea mo fakahoko atu mo ‘ene poaki mālōlō ta’u ‘e taha kae ‘alu ki Niukaletonia ‘i he ki’i fatongia fakafāmili ‘oku ne mo’ua ki ai ‘i he ta‘u ni. Ko ia ‘e le‘ole‘o atu pe ‘a e Tokoni Palesiteni, Vili Vete, kae ‘oua kuo toe fai ha fili fo’ou ‘i he fakataha hoko ‘a e PSÁ National Committee. ‘E toki fanongongo atu mei he kau Fakafofonga faka-Potungāue ‘a e taimi fakataha hoko ‘a e PSA National Committee.

‘Oku ‘oatu foki moe talamonū ‘a e PSA kia Sione Vuna Fa’otusia, CEO ‘o e Potungāue Fakamaau’angá, ki he fatongia fo’ou kuo ‘oatu kiate koé pea ‘oku mau fakatauange ke fai tokonia koe ‘e he ‘Eikí mo Ne foaki ivi kiate ke ke fataki e fatongia fo’oú mo ho‘o ngāue kotoa pē ‘aki e lelei tahá ke ma’u ‘e Tonga ‘a e Fakamaau Totonu, Pule Lelei moe Vahevahe Taau.

‘Oku mou mea’i kotoa pe kau Memipa, na’e vela hotau ‘ofisí ‘aia na’e tu’u ‘i Tungi Arcade ‘i he fakatamaki ko ia na’e hoko ‘i he 16/11, 2006 pea na’e mole kotoa ai ‘etau ngaahi naunau faka’ofisi na’e tuku ai. ‘Oku kei feinga ‘a e Poate Pule ke kumi pea fokotu’u ha tau ‘ofisi fo’ou pea ‘e toki fakahoko atu ke mou ‘ilo’i ‘a e feitu’ú.

Hangē pe ko ia kuo mou mea’i mei he ngaahi ongoongo ‘o e ngaahi ‘aho ni, kuo ala mai ‘a hotau kau Taki ‘i he Ngāue’anga, Palemia mo e Kapinetí, ‘o tautea ‘a e ni’ihi ‘i ho’omou Poate Pulé koe‘uhi ko e ngaahi fatongia kuo nau fai ke fakafofonga’i kitautolu ‘i he muia ‘o e taumu’a folau na’a tau pole mo palomesi ki ai ki he Kakai ‘oe Fonuá ke fai ha fakalelei fakapolitikale ki he fa’unga ‘o e Fonuá ke malava ke tau ‘inasi ai ‘i he Ngaue’angá, mo e Fonuá ‘i he Fakamaau Totonu, Pule Lelei mo e Vahevahe Taau. Pea neongo ‘a e ngaahi tautea ko eni kuo fai ki he ni’ihi ‘o e kau memipa ho’omou Poate Pulé, ‘oku ‘ikai tuka ai heni ‘enau feinga ke fakahoko honau fatongia kiate kimoutolu ‘aki honau lelei taha.

Makatu’unga ‘i he ongoongo na’e ‘omai mei Vava’u ‘i he kamata’anga ‘oe ta’u ni, ko e lea ‘a e Palemiá, Feleti Sevele, ‘i he’ene fakataha moe kau Ngāue Fakapule’anga ‘i Vava’ú, ‘a ia tokua na’a ne pehē ai (1) ‘oku ‘ataa ki he kau Ngāue Fakapule’angá ki he’enau ngaahi fakakaukau ki he ngaahi me’a fakapolitikale ‘oku hoko ‘i he fonua ni ka kuopau ke tau fakahoko hake ‘i he founga ngāué (procedures), ‘a ia ko e ‘o hake ‘i he ‘Ulu ‘o e Potungāue; (2) ‘e ‘osi ‘a e Aleapau Femahino’aki (Memorandum of Understanding – MOU), ‘a ia na’e fai ‘e he kau Tukungāue ‘o e 2005 mo e Kapineti, ‘i he faka’osinga ‘o Sune 2007 pea ne pehē tokua ‘e foki ai hotau tu’unga vāhengá ki he me’a motu’á ‘o fakatatali koā ki ha toe aleapau fo’ou.

‘Oku mahu’inga, kau Memipa, ke mou ‘ilo’i ‘etau ngaahi tu’utu’uni ‘i he Ngāue’angá koe‘uhi ke tau muimui ki ai kae malava ke fakahoko lelei hotau ngaahi fatongia ki he Pule’angá pea moe Fonua foki. Mou fakatokanga’i ange, fakatatau ki he Lao ki he Ngāue Fakapule’angá mo e ngaahi Tu’utu’uni, ‘oku ‘ikai fakangofua ai ke tau kau ki ha ngaahi ngāue fakapolitikalé ‘i he taimi ngāué, ‘aia ko e 8:30 pongipongi ki he 4:30 efiafi ‘oe ngaahi ‘aho ngāue, ‘aho Monite ki he Falaite, tuku kehe kinautolu ‘oku nau ngāue ki ha taimi tepile (shift). Kapau ‘oku tau fie kau atu ki ha ngāue fakapolitikale ‘o hangē ko ia ‘oku hoko ‘i he ngaahi ‘aho ni, lolotonga ‘a e taimi ngāue, pea kuopau leva ke tau kole ha poaki ki he ‘Ulu ‘etau Potungāué. Kapau leva ko e ngāue ia ‘i tu’a ‘i he taimi ngāue ‘a e Pule’angá pea ko e tau’ataina ia ‘a taua ke ta fai ‘eta ngāue ‘oku ta fie kau kiai, kae fakapapau’i pe ‘oku ‘ikai te ta maumau’i ‘a e ngaahi Lao ‘o e lau’i kovi pe malu’i ‘o e Tu’i mo hono Falé, ‘o hangē ko e Tau’ataina ki he tohi (write), lea (speak) mo e paaki (print) kuo tuku mai ‘i he Kupu 7 ‘oe Konistutone hota ki’i Fonuá ni.

Fekau’aki mo e pehē koia ‘e toe foki ‘a e vāhengá tokua ki he me’a motu’á pea ‘oku faka’uhinga ‘e he ni’ihi tokua ko e ‘uhinga ‘a e Palemia ‘e to’o ‘etau hiki vahenga 60, 70, 80%. Kau Memipa, ‘oku mau loto ke fakamahino atu heni na’e ‘ikai ha femahino’aki pehē pea mo e timi ‘a e Kapineti na’a nau fakafofonga’i ‘a e Pule’angá. Fakatatau ki he fepotalanoa’aki femahino’aki mo e timi ‘a e Kapineti ‘aia na’e kau mai ki ai ‘ae Palemia ‘o e taimi ni, na’e ‘uhinga ‘o e ‘ai ‘o e MOU ke ta’u ‘e 2 he ko e taimi ia na’e kole ‘e he PSC ‘oku nau fiema’u ke fakakakato honau fatongia ke faka’osi ‘enau ngāue ki he tu’unga vahenga fo’oú (new salary structure), na’e makatu’unga ai ‘a e tukungāué, ke a’u ki he Phase 2 & 3 ‘a ia na’a nau pehē ‘e lelei ange ia ‘i he 60, 70, 80%. Ko e femāhino’aki leva ke ta’u ‘e 2 pe ‘etau MOU kae fai ‘e he Palemia (ko e Minisita ‘oe PSC) mo ‘ene Potungāue PSC honau fatongiá ko e faka’osi ‘enau ngāue na’e te’eki ai ke maau ke ‘osi ki he faka’osinga ‘o Sune 2007 pea hoko atu leva ki ai e vāhenga te tau ngāue’akí ‘aia ko e tu’unga vāhenga fo’oú. Na’e ‘iai foki moe ‘amanaki ‘i he lolotonga ‘o e ta’u ko ‘eni ‘e 2 ‘e fai ha’atau fēngaue’aki moe PSC ki he fakalelei ‘o e tu’unga vāhenga fo’ou ko ení koe‘uhí ke ‘oua na’a fai ha toe femamahi’aki ‘i he taimi te tau hiki ai ki aí, ka ko e toe pe eni ‘a e māhina ‘e 4 mo e te’eki ai pe ke fai mai ha fetu’utaki mei he Potungaue ‘ae Palemiá (PSC) ki he ngāue ko ení. ‘Oku tau ‘amanaki lelei pe na’e fai pe ‘e he Palemiá hono fatongiá na’e ‘osi tukuange kiai mo ‘ene Potungaue neongo na’e ‘ikai ke tau kau atu ki ai pea ‘oku tau ‘amanaki lelei kotoa ki he kamata ha tu’unga vāhenga fo’ou ‘e toe lelei angé ‘i Siulai.

‘Oku lahi ‘a e ngaahi me’a ‘oku fie fakahoko atu ho’omou Poate Pule, ko ia temau feinga ke hokohoko atu ‘etau kolomu ni he uike kotoa. Ka ‘oku mou fiema’u ha toe fakamatala pe tokoni pea ke fetu’utaki mai pe ki he fika telefoni 52-899 kae ‘oua leva ke fokotu’u hotau ‘ofisí. ‘Oku kei ‘atā e lesisita ki he PSA mo e Credit Union ‘a e PSA. Lau ma’u pe he KELE’A mo e Tongastar website (www.tongastar.com) ke ke ‘inasi he ngaahi langa ngaue ho’omou Kautaha.

Faka’apa’apa atu,

In Unity & Solidarity

POATE PULE ‘A E PSA