October 17, 2007                                        News You Can Trust!!                                      Volume 7

'Ikai lava ta'ofi he Minisita Polisi poupou kakai ki he 'Ikale Tahi

Neongo 'a e 'ikai ke tali he Minisita Polisi Hon. Siaosi 'Aho 'a e float 'a e kakai ko 'enau poupou ki he 'Ikale Tahi ka ne hokoatu pe float ia. Ko e float ko 'eni ne fokotu'utu'u 'e he 'ofisi 'akapulu moe kau pisinisi 'o taki ai 'a Peseti Ma'afu mo 'Ofa Simiki pea ne fai ai 'enau tohi kole ki he Minisita ke fai 'a e float 'a e kakai pea ne 'ikai tali he Minisita.

Na'e kamata mai float moe laka ne taki mai 'e Hon. Fanetupouvava'u pea muimui mai kakai neongo hono ta'ofi mai he kau polisi. 'Oku fakatumutumu 'a e kakai tokolahi he 'atamai 'a e Minisita pe 'oku 'ikai nai ke fiefia he ola 'a e va'inga fanau 'Ikale Tahi. Pea ko hono ola pe 'eni ko e ma'ama'a 'ene ngaahi lea moe tohi ta'ofi.

Ne fai he kakai Tonga 'a e float 'i Nu'usila pea ne 'ikai toe ta'ofi he kau polisi ka nau kau aipe he 'ai 'a e fuka Tonga 'i he'enau me'alele pea nau faita moe kakai. Pea ko e lea koia 'a e kau polisi Nu'usila ko e me'a fakafiefia kiate kinautolu 'a e fiefia 'a e kakai. Pea ko e me'a ia 'oku ongo ko e faka'ata he kau polisi Nu'usila 'a e kakai Tonga kenau float mo laka honau fonua kae ta'ofi he Minisita polisi ke laka 'a e kakai 'i Tonga ni ke poupou'i 'enau timi fakafonua.

Ko e me'a tatau ne fai he Minisita ko 'eni he ta'u kuo'osi ko 'ene ta'ofi 'a e laka 'a e kau pisinisi pea pehe ki he laka 'a e kakai ma'ae OBN. Ko e me'a ne hoko ne 'ikai toe lava he kau polisi 'o ta'ofi pea ne kau moe kau polisi he mamahi he fa'ahinga fakakaukau 'a e Minisita. Ko e laka 'a e kakai 'i he'enau totonu fakakonisitutone kae tu'u mai ia he'ene me'a fakafo'ituitui.